31 ივლისს, საქართველოს 9 ტექნოპარკში გაიმართა სტარტაპ ინკუბატორის გახსნითი ღონისძიება, რომელიც პროექტის საწყისი ფაზის ერთ-ერთ უმნიშვნელოვანეს ეტაპს წარმოადგენდა. ღონისძიება ლაივსტრიმის საშუალებით ერთდროულად გადაიცემოდა ყველა რეგიონულ ტექნოპარკში, რამაც ინიციატივის მასშტაბურობა და მონაწილე გუნდებისთვის თანაბარი ხელმისაწვდომობა უზრუნველყო.
ღონისძიება ოფიციალურად გახსნა ტექნოპარკების დეპარტამენტის უფროსმა - გიორგი კეჟერაშვილმა. მან ყურადღება გაამახვილა პროექტის მნიშვნელობაზე და საქართველოში ინოვაციური ეკოსისტემის ხელშეწყობის აუცილებლობაზე. ამასთან, პროექტის ხელმძღვანელმა- ირაკლი სვანიძემ დეტალურად განიხილა პროგრამის სტრუქტურა, მიზნები და მოლოდინები, აგრეთვე სამუშაო პროცედურები და სტრატეგიული მიმართულებები.
სტარტაპ ეკოსისტემის წარმომადგენლებმა და დარგის ექსპერტებმა — ქეთევან ხუნწარიამ და გეგი გვაზავამ — წარმოადგინეს პრეზენტაციები, რომლებიც შეეხებოდა საინვესტიციო შესაძლებლობებსა და ფიჩინგის კულტურას. ექსპერტებმა განსაკუთრებით გაუსვეს ხაზი იმას, თუ რა კრიტერიუმებით აფასებენ ინვესტორები ახალ ინიციატივებს და როგორ შეიძლება გუნდებმა ეფექტიანად წარმოაჩინონ საკუთარი სტარტაპის ღირებულება.
მენტორებმა, რომლებიც მომავალშიც აქტიურად იმუშავებენ მონაწილეებთან, ჩაატარეს გაცნობითი სესია, სადაც სტარტაპებს მიეცათ შესაძლებლობა გაეზიარებინათ საკუთარი ინტერესები და სამუშაო თემატიკა. აღნიშნულმა სესიამ მნიშვნელოვანი როლი ითამაშა გუნდების სამუშაო პრიორიტეტების განსაზღვრასა და მომავალი თანამშრომლობის ეფექტიან ორგანიზებაში.
ღონისძიების დასასრულს მონაწილეებს მიეწოდათ დეტალური ინფორმაცია პროგრამის მომავალი ეტაპების შესახებ, მათ შორის დაგეგმილი ონლაინ ლექციები და მენტორინგ სესიები, რომლებიც სისტემატურად ჩატარდება და დაეხმარება გუნდებს ცოდნის გაღრმავებაში, ბიზნეს მოდელის დახვეწასა და იდეების განვითარების პროცესში.
ტექნოპარკის სტარტაპ ინკუბატორი მიზნად ისახავს ინოვაციური გარემოს გაძლიერებას საქართველოს რეგიონებში, ახალგაზრდებისა და დამწყები მეწარმეების სტარტაპ საქმიანობის ხელშეწყობას, საერთაშორისო გამოცდილების გაზიარებას და ბიზნესის შექმნისა და ზრდის პროცესში მათი ინტეგრაციის გაძლიერებას.
