კავკასიის მედიცინის სკოლის და კავკასიის უნივერსიტეტის ტრენინგ ცენტრის მიერ სკოლის აკადემიური პერსონალის მეთოდოლოგიური მომზადების მიზნით მიმდინარეობს მეთოდოლოგიური ტრენინგ-სემინარების ციკლი “თანამედროვე სამედიცინო განათლების საფუძვლები”. 2024 წლის 24 იანვარს ჩატარდა ციკლის I კლასი - „პარადიგმის ცვლილება: მედიცინის სწავლებიდან - მომავლის ექიმის უნარების ათვისებამდე“.
სემინარი მომზადებულია ევროპაში სამედიცინო განათლების ასოციაციის (AMEE) სპეციალური კურსის - სამედიცინო განათლების ბაზისური უნარები (ESME) მასალების მიხედვით. ტრენინგს უძღვებოდნენ კავკასიის უნივერსიტეტის მედიცინის პროგრამის აკადემიური ხელმძღვანელი, პროფესორი ზვიად კირტავა და ასოცირებული პროფესორი სოფიო ტატიშვილი.
სემინარის ფარგლებში განხილულ იქნა შემდეგი აქტუალური საკითხები:
- სამედიცინო განათლების დღევანდელი დღე და გამოწვევები, სწავლის 3 დონე და შედეგები, სტუდენტზე-ორიენტირებული სწავლა;
- სამედიცინო განათლების მიზანი - შედეგზე- და კომპეტენციებზე-დაფუძნებული განათლება;
- თანამედროვე ლექტორ-განმანათლებლის როლები და ფუნქციები;
- უკუკავშირი, როგორც სტუდენტის ეფექტური მოტივაცია; პორტფოლიო, როგორც სტუდენტის თვითორგანიზების მექანიზმი;
- შეფასების არსი, მნიშვნელობა, ფორმები და სირთულეები.
სემინარს დაესწრო კავკასიის მედიცინის სკოლების აკადემიური პერსონალი და მოწვეული ლექტორები. პრეტესტის და პოსტ-ტესტის შევსების შემდეგ მსმენელებზე გაიცა ტრენინგის გავლის დამადასტურებელი სერტიფიკატები.
სემესტრის დასრულებამდე დაგეგმილია კიდევ ორი დამატებითი კურსის ჩატარება: პრაქტიკული უნარების შეფასების თანამედროვე მეთოდების (OSCE - ობიექტურად სტრუქტურირებული კლინიკური გამოცდა, სამუშაო ადგილზე შეფასება) და ელექტრონული პორტფოლიოს საკითხებზე.
უმაღლესი სამედიცინო განათლების დარგობრივი მახასიათებლის თანახმად, სამედიცინო მეთოდოლოგიური ტრენინგის ყოველ 2 წელიწადში გავლა აუცილებელია თითოეული მედიკოსი ლექტორისათვის.
