სერგი კაპანაძე კავკასიის უნივერსიტეტის სახელმწიფო მართვის სკოლის მოწვეული პროფესორი და ჟან მონეს პროფესორია (2015-2017 წწ.). იგი ასევე არის ილიას სახელმწიფო უნივერსიტეტის პროფესორი და საერთაშორისო პოლიტიკის ჟურნალ GEOpolitics-ის მთავარი რედაქტორი.

მას ოც წელზე მეტი გამოცდილება აქვს როგორც აკადემიურ სფეროში, ისე დიპლომატიასა და საჯარო მმართველობაში. სხვადასხვა პერიოდში ეკავა საქართველოს საგარეო საქმეთა მინისტრის მოადგილის, საქართველოს პარლამენტის ვიცე-სპიკერის, საგარეო საქმეთა სამინისტროს საერთაშორისო ორგანიზაციების დეპარტამენტის დირექტორის, საქართველოს ეროვნული უსაფრთხოების საბჭოს ანალიტიკოსისა და საქართველოს პრეზიდენტის ადმინისტრაციის მრჩევლის თანამდებობები.

დიპლომატიური საქმიანობის ფარგლებში იგი იყო საქართველოს მთავარი მომლაპარაკებელი ჟენევის საერთაშორისო მოლაპარაკებებში, საქართველოს მთავარი მომლაპარაკებელი რუსეთის მსოფლიო სავაჭრო ორგანიზაციაში (WTO) გაწევრიანების საკითხზე და ევროკავშირთან ასოცირების შეთანხმებაზე მოლაპარაკებების ხელმძღვანელის მოადგილე. ასევე წარმოადგენდა საქართველოს მრავალრიცხოვან მოლაპარაკებებსა და საერთაშორისო ფორუმებზე გაეროს, ეუთოს, ევროპის საბჭოსა და ევროკავშირის ფორმატებში.

სერგი კაპანაძე არის საერთაშორისო უსაფრთხოების, ევროპული ინტეგრაციისა და კონფლიქტების მოგვარების საკითხებზე აღიარებული ექსპერტი. 2015–2017 წლებში იგი იყო ეუთოს „ევროპული უსაფრთხოების, როგორც საერთო პროექტის“ მაღალი დონის ექსპერტთა პანელის (OSCE Panel of Eminent Persons) წევრი და მონაწილეობდა ევროპის უსაფრთხოების არქიტექტურის მომავლის შესახებ სტრატეგიული რეკომენდაციების შემუშავებაში. ასევე იყო ეუთოს სპეციალური სამუშაო ჯგუფის წევრი, რომელიც კონფლიქტურ რეგიონებში სტატუს-ნეიტრალური შეიარაღების კონტროლის მექანიზმების შემუშავებაზე მუშაობდა.

აკადემიური საქმიანობის ფარგლებში სერგი კაპანაძე 2005 წლიდან ასწავლის საერთაშორისო ურთიერთობებს, ევროპულ ინტეგრაციას, ევროკავშირის პოლიტიკას, საერთაშორისო ორგანიზაციებს, მოლაპარაკებების თეორიასა და პრაქტიკას, კონფლიქტების მართვასა და მშვიდობის კვლევებს. სხვადასხვა პერიოდში იყო თბილისის სახელმწიფო უნივერსიტეტის, კავკასიის უნივერსიტეტისა და ილიას სახელმწიფო უნივერსიტეტის პროფესორი. ასევე კითხულობდა ლექციებს ევროპის წამყვან უნივერსიტეტებში, მათ შორის ცენტრალური ევროპის უნივერსიტეტში (CEU), ლილის კათოლიკურ უნივერსიტეტში (ESPOL), გლაზგოს უნივერსიტეტში, ბარსელონის ავტონომიურ უნივერსიტეტსა და Collegium Civitas-ში.

სერგი კაპანაძე არის ევროკავშირის, დემოკრატიზაციის, ევროპეიზაციის, რუსეთის საგარეო პოლიტიკის, უცხოური საინფორმაციო მანიპულაციისა და ჩარევის (FIMI), სამხრეთ კავკასიის უსაფრთხოების, ევროკავშირის გაფართოებისა და კონფლიქტების ტრანსფორმაციის საკითხებზე არაერთი აკადემიური ნაშრომის, სახელმძღვანელოს, პოლიტიკის დოკუმენტისა და საერთაშორისო პუბლიკაციის ავტორი. მისი სტატიები და კვლევები გამოქვეყნებულია ისეთ გამოცემებში, როგორებიცაა CEPA, ECFR, LibMod, Euractiv, SCEEUS, Europe’s World და სხვა საერთაშორისო პლატფორმები.

სერგი კაპანაძეს მიღებული აქვს საერთაშორისო ურთიერთობების დოქტორის ხარისხი თბილისის სახელმწიფო უნივერსიტეტში და მაგისტრის ხარისხი ცენტრალური ევროპის უნივერსიტეტში. ის არის საქართველოს საგანგებო და სრულუფლებიანი დესპანი (2009) და დაჯილდოებულია საქართველოს პრეზიდენტის ღირსების ორდენით (2011).